बंगळुरु : भारतीय अवकाश संशोधन संस्था म्हणजेच इस्त्रोकडून चांद्रयान ३ बाबत अपडेट दिल्या जात आहेत. इस्त्रोनं २३ ऑगस्टला चंद्राच्या दक्षिण ध्रुवावर चांद्रयान ३ उतरवून इतिहास रचला होता. २३ ऑगस्ट ते ४ सप्टेंबर या काळात विक्रम लँडरकडून काम सुरु होतं. तर, रोवर २ सप्टेंबर पर्यंत सुरु होता. चंद्रावर रात्र होणार असल्यानं प्रज्ञान रोवरला २ सप्टेंबरला तर विक्रम लँडरला ४ सप्टेंबरला स्लीप मोडवर पाठवण्यात आलं होतं. त्यानंतर ५ सप्टेंबरला चंद्रावर रात्र झाली. चंद्रावरील रात्रीमध्ये विक्रम लँडर कसा दिसतो याचा फोटो चांद्रयान २ च्या ऑर्बिटरकडून टिपण्यात आला आहे. चांद्रयान २ च्या ऑर्बिटरवर लावलेल्या खास कॅमेऱ्याद्वारे अंधारामध्ये चांद्रयान ३ च्या विक्रम लँडरचा फोटो टिपला आहे.. ६ सप्टेंबर २०२ ला हा फोटो टिपण्यात आला आहे. यामध्ये चंद्राचा भूभाग निळा, हिरवा आणि काळ्या रंगाचा असल्याचं दिसून येतं. चांद्रयान २ च्या ऑर्बिटरनं टिपलेल्या फोटोमध्ये पिवळ्या रंगाचा चमकणारा भाग दिसत आहे तो चांद्रयान ३चा विक्रम लँडर दिसून येत आहे. इस्त्रोनं चांद्रयान २ च्या ऑर्बिरटनं टिपलेले दोन फोटो शेअर केलेल आहेत. पहिला फोटो जून महिन्यातील आहे. तर दुसरा फोटो चांद्रयान ३ चंद्रावर उतरल्यानंतरचा ६ सप्टेंबरचा आहे. इस्त्रोनं एकूण तीन फोटो शेअर केले आहेत. हे फोटो चांद्रयान २ वरील एल एस ड्युअल फ्रिक्वेन्सी सिंथेटिक अपार्चर रडार द्वारे टिपण्यात आले आहेत. इस्त्रोनं जून महिन्यातील फोटो आणि ६ सप्टेंबरचा फोटो शेअर करुन विक्रम लँडरचं स्थान निश्चित केलं आहे. DFSAR उपकरण काढू शकतं अंधारात फोटो? DFSAR हे एक असं उपकरण आहे जे अंधारात हाय रिझोल्यूशन पोलैरीमेट्रिक मोडमध्ये फोटो काढतं. म्हणजेच तें अंधारात धातूमधून निघाणारी उष्णता आणि प्रकाश टिपतं. याचं वैशिष्ट्य म्हणजे तो नैसर्गिकरित्या निर्माण झालेला धातू असेल किंवा मानवनिर्मित धातू असू शकेल.चांद्रयान २ च्या ऑर्बिटरनं २५ ऑगस्ट २०२३ ला देखील चांद्रयान ३ च्या विक्रम लँडरचा फोटो टिपला होता.