सातारा : काळज, तालुका फलटण येथे घराच्या जमिनीच्या वादातून नितीन तकदीर मोहिते वय 40 तालुका फलटण यांचा 14 ऑक्टोबर रोजी रात्री पावणेआठ वाजता अज्ञातांकडून खून झाला होता. या प्रकरणामध्ये लोणंद पोलिसांनी कौशल्यपूर्ण तपास करून सहा आरोपींना ताब्यात घेतले. यामध्ये एका विधी संघर्षित बालकाचा समावेश आहे.

या प्रकरणाची अधिक माहिती अशी, मयत नितीन तकदीर मोहिते यांचे विमल मोहिते यांच्याशी घराच्या जागेवरून फेब्रुवारी 2024 मध्ये वाद झाला होता. त्यावेळी मयत नितीन मोहिते यांनी विमल मोहिते यांना धक्काबुक्की केल्याने त्यांना दवाखान्याचा दहा हजार रुपये खर्च आला होता. हे प्रकरण त्यांनी गाव पातळीवर मीटिंग घेऊन मिटवले होते. मात्र विमल मोहिते यांचा मुलगा दीपक महादेव मोहिते यांनी मात्र त्याचा राग मनात ठेवला होता. दीपक मोहिते यांचा मुलगा कृष्णा मोहिते वय 22 राहणार शिवाजी पार्क समर्थ नगर नवी सांगवी पुणे याने त्याचे साथीदार यश बबन सोनवणे वय18 राहणार हडपसर माळवाडी पुणे, विशाल अशोक फडके वय 20 राहणार नवी सांगवी साई चौक पुणे, ओंकार किशोर खंडाळे वय 19 राहणार पिंपळे गुरव लक्ष्मी नगर पुणे, ऋषिकेश तीर्थराज सकट वय 19 राहणार पिंपळे गुरव लक्ष्मी नगर पुणे आणि अन्य एक विधी संघर्षित बालक यांच्या साह्याने मयत मोहिते यांच्यावर पाळत ठेवली होती. यामध्ये फिर्यादी राजेश मोहिते याचा सुद्धा सहभाग असल्याचे समोर आले आहे.

दिनांक 14 ऑक्टोबर रोजी सायंकाळी पाच वाजता रितेश मोहिते व विधी संघर्षित बालक यांनी नितीन मोहितेच्या हालचाली कृष्णा मोहिते याला फोनवरून दिल्या. नितीन मोहिते हा लक्ष्मी देवीच्या मंदिरात मांडवात बसला आहे, हे समजताच कृष्णा मोहिते यांच्यासह चौघांनी येथे येऊन नितीन मोहिते यांच्या डोक्यात, तोंडावर, दोन्ही हातावर, पायावर कठीण धारदार शस्त्राने वार केले. तसेच छातीत सुरा भोसकून त्याचा खून केला. या प्रकारामुळे गावात एकच खळबळ उडाली होती.