बांगलादेश : बांगलादेशात अंतरिम सरकार स्थापन झाल्यानंतर आता शांतता प्रस्थापित करण्याचे प्रयत्न सुरू झाल्याचे दिसत आहे. बांगलादेशच्या अंतरिम सरकारचे गृह व्यवहार सल्लागार ब्रिगेडियर जनरल (निवृत्त) एम सखावत हुसैन यांनी आंदोलकांना 19 ऑगस्टपर्यंत सर्व अवैध शस्त्रे सुपूर्द करण्यास सांगितले आहे. यामध्ये नुकत्याच झालेल्या हिंसाचारात सुरक्षा दलांकडून लुटण्यात आलेल्या रायफल्सचाही समावेश आहे.

बांगलादेशी मीडिया डेली स्टारने दिलेल्या वृत्तानुसार हुसैन म्हणाले की, लुटलेली शस्त्रे जवळच्या पोलीस ठाण्यांना परत न केल्यास अधिकारी शोध घेतील. शोध मोहिमेदरम्यान कोणाकडे विनापरवाना शस्त्रे आढळून आल्यास त्याच्यावर गुन्हा दाखल करण्यात येईल.

संयुक्त लष्करी रुग्णालयात निमलष्करी बांगलादेश अन्सार सदस्यांची भेट घेत असताना हुसैन यांनी ही माहिती दिली. विद्यार्थ्यांच्या निदर्शनादरम्यान झालेल्या हिंसाचारात निमलष्करी दलाचे अनेक जवान जखमी झाले आहेत. खरे तर बांगलादेशातील आरक्षणाविरोधातील आंदोलन शेख हसीना यांच्या खुर्चीसाठी अडचणीचे ठरले होते, त्यानंतर शेख हसीना यांनी आठवड्याभरापूर्वी बांगलादेशच्या पंतप्रधानपदाचा राजीनामा दिला होता.

राजीनामा दिल्यानंतर शेख हसीना भारतात आल्या आणि अजूनही भारतातच आहेत. त्यांना भारत सरकारने सुरक्षा दिली आहे. मात्र, शेख हसीना जास्त काळ भारतात राहणार की त्यांना अन्य कोणत्या देशात पाठवले जाणार हे अद्याप स्पष्ट झालेले नाही.

शेख हसीनाच्या विरोधात विद्यार्थ्यांनी केलेल्या हिंसक आंदोलनाचे अनेक व्हिडिओही सोशल मीडियावर व्हायरल झाले आहेत. यातील एका व्हिडिओमध्ये एक तरुण 7.62 मिमीची रायफल हिसकावताना दिसत आहे. या व्हिडिओचा संदर्भ देत हुसैन म्हणाले की, रायफल आता परत केलेली नाही. जर तुम्ही स्वतः शस्त्रे द्यायला येऊ शकत नसाल तर तुम्ही दुसऱ्याला शस्त्रे पाठवू शकता.

नुकतेच बांगलादेशातून असे दृश्य समोर आले होते, ज्यामध्ये बांगलादेशात राहणारे हिंदू भारतात येण्याचा प्रयत्न करत आहेत. कूचबिहारमधील भारत-बांगलादेश सीमेवर शेकडो बांगलादेशी नागरिक आणि हिंदू जमले होते. बांगलादेशच्या भागात पडणाऱ्या भागात सर्व लोक उभे होते. मात्र, त्यांना भारतात नेले जाऊ शकत नाही, असे बीएसएफने त्यांना समजावून सांगितले होते.