महाबळेश्वर : महाबळेश्‍वर गिरीस्थान पालिकेच्या आणि पोलीस प्रशासनाच्या रस्ते वाहतुकीसंदर्भातील भोंगळ कारभाराविरोधात महाबळेश्वर मधील पत्रकार एकदिवसीय लाक्षणिक उपोषणाला बसले.

महाबळेश्वरची बाजार पेठ अर्थात डॉ. साबणे रोड सर्व वाहनांसाठी बंद आहे. परंतु महाबळेश्वर येथील दुचाकीस्वार व माल वाहतूक करणारे वाहन चालक हे या नियमांचे पालन करित नाहीत. वारंवार तक्रारी करूनही पोलीस व पालिका प्रशासन याकडे दुर्लक्ष करित असल्याने अखेर पत्रकारांना आंदोलनाचा मार्ग स्वीकारावा लागला आहे.

पत्रकार संघाचे अध्यक्ष अजित जाधव यांच्या नेतृत्वाखाली महाबळेश्वर महाबळेश्वर येथील सर्व पत्रकार आज सकाळी पोलीस ठाण्यासमोर एक दिवसाच्या लाक्षणिक उपोषणाला बसले. महाबळेश्‍वर पोलीस ठाण्यासमोरच पत्रकारांनी हे आंदोलन सुरू केले. पालिका आणि पोलीस प्रशासनाने पत्रकारांच्या आंदोलनाची दखल घेऊन बाजार पेठेत वाहनाची घुसखोरी रोखण्यासाठी अडथळे लावले आहेत. या अडथळ्यामुळे चार चाकी वाहनांची घुसखोरी रोखण्यात आली. परंतु आज अखेर दुचाकीस्वार मात्र बाजार पेठेत बिनदिक्कत आपल्या गाड्या दामटत आहेत. त्यांना रोखणे आवश्यक आहे. त्यासाठीच आज पत्रकार उपोषणास बसले. या संदर्भात प्रशासन जोपर्यंत ठोस कारवाई करीत नाही तोपर्यंत उपोषण सुरु राहील, असा इशारा आंदोलक पत्रकारांनी दिला.