फलटण : फलटण शहरात अनियंत्रितपणे ध्वनिक्षेपक लावणार्‍या दहा डीजे मालकांवर फलटण शहर पोलिसांनी कारवाई केली आहे.
याबाबत मिळालेल्या माहितीनुसार, काल फलटण शहरात श्री गणेश चतुर्थीच्या निमित्ताने अनेक गणेशोत्सव मंडळांनी श्री गणेश मूर्तीच्या आगमनाच्या मिरवणुका काढल्या होत्या. परंतु मिरवणुकीच्या माध्यमातून काही डीजे मालकांनी आवाजाच्या मर्यादा ओलांडल्यामुळे फलटण शहरात गणरायाच्या आगमन उत्साहात डिजे वाल्यांच्या आवाजाच्या स्पर्धेमुळे नागरिक हैराण झाले होते. याबाबत नागरीकांमधून सोशल मीडियातुन तीव्र प्रतिक्रिया उमटल्या होत्या. 
त्यानंतर फलटण शहर पोलीस स्टेशनचे पोलीस निरीक्षक हेमंतकुमार शहा यांच्या मार्गदर्शनाखाली सहाय्यक पोलीस निरीक्षक नितीन शिंदे, पोहवा चंद्रकांत धापते, सचिन जगताप, बापूराव धायगुडे, पोलीस शिपाई मुकेश घोरपडे, महेश जगदाळे, सचिन पाटोळे, काकासो करणे, जितेंद्र टिके वगैरे यांनी डीजे मालकांवर कारवाईचा बडगा उगारत दबंग कारवाई केली.
कलम 36(इ-अ)/134 नुसार डीजे मालक शामराव अहिवळे स्वारगेट पुणे, अथर्व चौगुले कात्रज पुणे, शोएब आतार शुक्रवार पेठ फलटण, तुकाराम शिंदे झिरपवाडी फलटण, अभिषेक जगदाळे दहिवडी, ऋतुराज सरगर धनगरवाडी सातारा, प्रदीप जगताप विद्यानगर फलटण, श्यामकुमार काकडे स्वामी विवेकानंद नगर फलटण, राजेंद्र जाधव सुंदरनगर लोणंद, योगेश पोंदे सगुनामाता नगर फलटण, यांच्यासह अनेक मंडळाच्या पदाधिकारी कार्यकर्त्यांवर कारवाई केली. या कारवाईबद्दल फलटण शहर पोलीस स्टेशनचे अधिकारी व कर्मचार्‍यांचे नागरिकांमधून अभिनंदन होत आहे.
आगामी कालावधीत फलटण शहर पोलीस ठाण्याकडून अशीच कारवाई करण्यात येणार असल्याचे यावेळी शहर पोलीस स्टेशन कडून सांगण्यात आले. या पार्श्वभूमीवर फलटण शहर पोलीस ठाण्याकडून सर्व गणेश मंडळाच्या पदाधिकार्‍यांना गणेशोत्सवाचा आनंद सर्व जनतेस आनंदात व उत्साहात घेता यावा, जनतेस त्रास होणार नाही आणि परवानगी मध्ये दिलेल्या क्षमतेच्या मर्यादे पर्यंतच डीजे साउंडचा आवाज नियंत्रित ठेवावा. गणेश उत्सवानिमित्ताने विधायक किंवा लोकोपयोगी आणि आदर्श घेण्याजोगे तसेच मंडळाचे नावलौकिक वाढवणारे उपक्रम राबवावेत, असेही आवाहन यावेळी फलटण शहर पोलीस स्टेशनकडून मंडळांना करण्यात आले आहे.