सातारा : क्षेत्रमाहुली येथे शनिवारी सायंकाळी तरुणांनी एकत्र येत छगन भुजबळ यांच्या प्रतिकात्मक पुतळ्याचे दहन केले. महाराष्ट्रात सध्या मराठा आदोलन सुरु आहे. याला सर्वच स्तरातून मराठा योध्दा मनोज जरांगे पाटील यांना पाठींबा मिळत आहे. परंतु केवळ आपल्या राजकीय फायद्यासाठी समाजाचा वापर करत ओबीसी आणि मराठा समाजामध्ये अन्न व पुरवठा मंत्री छगन भुजबळ हे दरी निर्माण करण्याचा प्रयत्न करत आहेत. त्यामुळे त्यांचा निषेध करण्यासाठी छगन भुजबळ मुर्दाबाद अशा घोषणा देत त्यांच्या प्रतिकात्मक पुतळ्याचे दहन क्षेत्र माहुली ता. सातारा येथे शनिवारी सायंकाळी करण्यात आले.

याबाबत घटनास्थळावरुन समजलेली माहिती अशी, मराठा योध्दा मनोज जरांगे पाटील यांना मराठा आरक्षणाबाबत महाराष्ट्रातून उत्स्फूर्तपणे पाठींबा मिळत आहे. त्यांनी केलेल्या मागण्याबाबत सरकारने गांभीर्याने घेतल्यामुळे आता आरक्षण हे द्यावेच लागणार आहे, हे स्पष्ट होवू लागल्याने जाती-जातीमध्ये तेढ निर्माण करण्यासाठी बेतालपणे मंत्री छगन भुजबळ हे वक्त्व्य करत आहेत. त्या घटनेचा निषेध माहुली येथे तरुणांनी एकत्र त्यांचा प्रतिकात्मक पुतळा बनवून एक मराठा लाख मराठा, छत्रपती शिवाजी महाराज की जय, जय भवानी जय शिवाजी, हर हर महादेव अशा घोषणा देत छगन भुजबळ यांच्या प्रतिकात्मक पुतळ्याला आग लावली.