पुणे : मुंबई-पुणे एक्स्प्रेस वे वर सलग दोन दिवस दरडी कोसळल्याने प्रशासनाकडून दरडी काढण्यासाठी आता ठोस पाऊले उचलली जात आहेत. आज दुपारी १२ ते २ वाजेपर्यंत मुंबईकडे जाणारी वाहतूक बंद करण्यात आली होती. मात्र कामात अडथळे येत असल्याने ती वेळ आता वाढवण्यात आली होती. डोंगरावरील मोठे दगड काढण्याचे काम सुरू असल्यानं वेळ वाढला होता. प्रशासनाकडून दरडी कोसळलेल्या ठिकाणी जाळी बसवण्याचे काम देखील सुरू आहे. आताचं मिळालेल्या माहितीनुसार पुणे-मुंबई एक्सप्रेस-वे वरील विशेष ब्लॉक साडे तीन तासानंतर संपला. त्यानंतर मुंबईकडे जाणारी वाहतूक खुली करण्यात आली. रविवारच्या रात्री साडे दहा पासून विस्कळीत झालेली वाहतूक आता हळूहळू पूर्वपदावर येईल.

दुपारी बारा वाजल्यापासून महामर्गवरील राडारोडा काढण्याचे काम सुरू करण्यात आलं होतं. प्रशासनाकडून रस्त्यावर पडलेले दगड, माती उचलण्याचे काम करण्यात आलं आहे. येणाऱ्या काळात अशा घटना घडू नये म्हणून प्रशासनाकडून ही दखल घेतली जात आहे. डोंगराला मोठ्या जाळ्या बसवण्याचे काम सुरू असून कर्मचारी घटनास्थळी दाखल आहेत. 

मुंबई-पुणे एक्स्प्रेस वे हा पुणे-मुंबईला जोडणारा सर्वात मोठा दुवा आहे. अनेक नागरिक या महामार्गावरून दररोज प्रवास करताना आपल्याला पाहायला मिळतात. मात्र अशा दरड कोसळण्याच्या घटना घडल्याने वाहतुकीवर याचा मोठा परिणाम होतो. लोणावळ्यात आज सकाळपासूनच धीम्या गतीने वाहतूक सुरू होती. मुंबईकडे जाणारा मार्ग दुपारी साडे तीनला सुरु करण्यात आला.

पोलीस आणि एमएसआरडीसी प्रशासन यांच्याकडून रात्रीपासून महामार्गावरील राडारोडा काढण्याचे काम करण्यात आलं. सुरक्षिततेच्या दृष्टीने जाळ्या लावण्याचं काम सुरू आहे. दरडीचे दगड खाली येऊ नये म्हणून डोंगरांना जाळ्या लावण्याचे काम मोठ्या प्रमाणावर सुरू आहे. रात्री उशिरा दरड कोसळली ल्याने कोणतीही जीवितहानी झाली नाही.या घटनेनंतर मात्र प्रशासनाकडून पाऊले उचलली जात आहेत.

दरम्यान, साडे तीन तासांच्या ट्राफिक ब्लॉकनंतर मुंबईकडे जाणारी वाहतूक पूर्ववत करण्यात आली आहे.