सातारा : महिला बचत गटांच्या उत्पादनाला नवीन उंची व दिशा देणार्‍या ज्योतिर्मय महोत्सवाचे आयोजन दिनांक 8 ते 12 डिसेंबर यादरम्यान येथील जिल्हा परिषद मैदानावर करण्यात आले आहे. या निमित्ताने विविध कार्यक्रमांचे आयोजन करण्यात आले असून या महोत्सवाचा सर्व सातारकरांनी लाभ घ्यावा, असे आवाहन ज्योतिर्मय फाउंडेशनच्या अध्यक्षा सुवर्णाताई पाटील यांनी केले आहे. यंदा महोत्सवाचे दहावे वर्ष असून महोत्सवात दोनशे स्टॉल सहभागी झाले आहेत.

महोत्सवाचे उद्घाटन शुक्रवार दिनांक 8 डिसेंबर रोजी सायंकाळी पाच वाजता आमदार शिवेंद्रसिंहराजे भोसले यांच्या प्रमुख उपस्थित होणार आहे. यावेळी भाजपचे जिल्हाध्यक्ष धैर्यशीलदादा कदम, प्रदेश कार्यकारणी उपाध्यक्ष विक्रमजी पावसकर, माजी जिल्हा परिषद सदस्य सुनील काटकर, भाजप महिला मोर्चा आघाडीच्या सुरभी चव्हाण-भोसले यांची यावेळी विशेष उपस्थिती असणार आहे.

कार्यक्रमाच्या पहिल्या दिवशी सुर संगम हा सदाबहार हिंदी मराठी गाण्यांचा कार्यक्रम होणार आहे. शनिवार दिनांक 9 रोजी सायंकाळी सहा वाजता महिलांसाठी होम मिनिस्टर कार्यक्रमाचे आयोजन करण्यात आले आहे. रविवार दिनांक दहा डिसेंबर रोजी सायंकाळी सहा वाजता सन्मानित बचत गटांच्या महिलांचा विशेष सत्कार आयोजित करण्यात आला आहे. या सत्कार सोहळ्याला अण्णासाहेब पाटील आर्थिक विकास महामंडळाचे अध्यक्ष नरेंद्र पाटील, जिल्हाधिकारी जितेंद्र डूडी, आमदार अरुणअण्णा लाड, सहाय्यक आयुक्त समाजकल्याण नितीन उबाळे, भारतीय जनता पार्टीचे सचिव भरतनाना पाटील, कौशल्य विकास रोजगार विभागाचे सहाय्यक आयुक्त सुनील पवार, भाजप महिला आघाडीच्या प्रियाताई शिंदे, जिल्हा उद्योग केंद्राचे महाव्यवस्थापक उमेशचंद्र दंडगव्हाळ, जिल्हा कृषी अधिकारी भाग्यश्री फरांदे हे मान्यवर उपस्थित राहणार आहेत. यानंतर सरगम द फ्युजन या कार्यक्रमाचे आयोजन करण्यात आले आहे.

सोमवार दिनांक 11 डिसेंबर रोजी सायंकाळी सहा वाजता श्रीमंत शेळके प्रस्तुत ‘लावणी महाराष्ट्राची’ हा फर्मास लावणी कार्यक्रम होणार आहे. मंगळवार दिनांक 12 डिसेंबर रोजी सायंकाळी सहा वाजता हरिभक्त परायण लक्ष्मण महाराज राजगुरू यांच्या भारुडाचे आयोजन करण्यात आले आहे.

यंदा महोत्सवाचे दहावे वर्ष असून महोत्सवात दोनशे स्टॉल सहभागी होत आहेत. सातारकरांनी विविध महिला बचत गटांनी उत्पादित केलेल्या उत्पादनांच्या खरेदीचा आनंद घ्यावा, असे आवाहन सुवर्णाताई पाटील यांच्यासह कार्यकारणी सदस्य स्मिता शिंदे, निर्मला पाटील, अंजूम मणेर, सीमा भाटिया, राजश्री जोशी, दीप्ती पवार, अंजुम नदाफ, रीना भणगे, मल्लिका पुजारी, प्रतिमा मांढरे, राधिका पाटील व रेणुका शेटे यांनी केले आहे. हा महोत्सव सकाळी नऊ ते रात्री दहा वाजेपर्यंत सुरू असणार आहे.