सातारा : सातारा शहर परिसरातील करंजेत घरे फोडून सहा लाखांहून अधिक किमतीचा ऐवज लंपास, तर 2 दुचाकींचीही चोरी करण्यात आली. याप्रकरणी शाहूपुरी पोलीस ठाण्यात अज्ञात चोरट्यांच्या विरोधात गुन्हा नोंद करण्यात आला आहे. याबाबत पोलिसांनी दिलेल्या माहितीनुसार, याप्रकरणी नीलम नागेशनाथ मोहिते (मूळ रा. भाडळे, ता. कोरेगाव, सध्या रा. सातारा) यांनी तक्रार दिलेली आहे. त्यानुसार, दि. 25 ते 27 फेब्रुवारी दरम्यान घरफोडी आणि चोरीचा हा प्रकार करंजेतील सप्तर्षी प्राईड येथे घडला. अज्ञात चोरट्यांनी घरफोडीत रोख रक्कम, सोन्या-चांदीचे दागिने आणि दोन दुचाकी चोरून नेल्या आहेत. करंजे येथील एकूण तीन घरांत चोरी करण्यात आली. दरवाजाचा कडी-कोयंडा तोडून ही चोरी झाली आहे. तसेच परिसरातून दोन दुचाकीही चोरून नेण्यात आल्या आहेत. या घरफोडी व चोरीत अज्ञात चोरट्यांनी एकूण 6 लाख 22 हजारांचा मुद्देमाल लंपास केला आहे. या घटनेची नोंद शाहूपुरी पोलीस ठाण्यात करण्यात आली असून अधिक तपास पोलीस उपनिरीक्षक ढेरे करीत आहेत.