सातारा : एमबीबीएसचे शिक्षण पूर्ण झाल्यानंतर एमडीसाठी प्रवेश मिळवून देतो असे सांगून सातार्‍यातील डॉ.सुशीलकुमार घार्गे यांना पाच जणांनी 40 लाख रुपयांना गंडा घातल्याची धक्कादायक माहिती समोर आली. याप्रकरणी त्यांच्या वडीलांनी शहर पोलिस ठाण्यात तक्रार दिली असून याप्रकरणातील पैसे सातारा, पुणे येथे तसेच बँकेच्या खात्यावरुन वेळोवेळी पाठवले आहेत.

शेलैश, कुमार कुंदन, राणा, अरविंद चांडक, रोकडे (सर्वांची पुर्ण नावे, वय, पत्ता तक्रारदार यांना माहिती नाहीत) या पाच जणांवर 40 लाख रुपयांची फसवणूक केल्याचा गुन्हा दाखल झाला आहे. याप्रकरणी सुनील बाळासाहेब घार्गे (वय 55, रा.शाहूनगर, सातारा) यांनी शहर पोलिस ठाण्यात तक्रार दिली आहे.

पोलिसांनी दिलेली माहिती अशी, डॉ.सुशीलकुमार घार्गे यांचे 2015 मध्ये एमबीबीएसचे शिक्षण पूर्ण झाले आहे. पुढील एमडीचे शिक्षण पूर्ण करण्यासाठी त्यांनी एमडीची एन्ट्रांन्स परीक्षा दिली होती. याचदरम्यान, कुमार कुंदन याने तक्रारदार सुनील घार्गे यांना फोन करुन नर्‍हे, पुणे येथे एमडीसाठी प्रवेश मिळवून देतो असे सांगितले. प्रवेश देतो असे सांगितल्यानंतर त्यांनी सातार्‍यामध्ये त्यांना भेटण्यासाठी बोलवले. सातार्‍यात त्यांची भेट झाल्यानंतर एमडी प्रवेशाची प्रक्रिया सांगितली. ती प्रकिया घार्गे यांना मान्य झाल्यानंतर संशयित कुंदन याने टोकन म्हणून जानेवारी 2018 मध्ये 50 हजार रुपये मागितले व त्यानुसार ते पैसे त्यांना दिले.

फेब्रुवारी 2018 मध्ये पुन्हा संशयिताने फोन करुन प्रवेश प्रक्रियेचा महत्वपूर्ण टप्पा पूर्ण करण्यासाठी 25 लाख रुपये पाठवण्यास सांगितले. त्यानुसार तक्रारदार घार्गे यांनी विविध तीन बँकेच्या खात्यावरुन त्यांच्या खात्यावर पैसे पाठवले. पुढे संशयितांनी आणखी वेळोवेळी पैसे मागितले त्यानुसार एकूण 40 लाख रुपये त्यांना देण्यात आले. सर्व ठरल्याप्रमाणे पैसे दिल्यानंतरही एमडीसाठी प्रवेश मिळत असल्याने तक्रारदार यांनी याबाबत संशयितांकडे तगादा लावला. प्रवेश होत नसल्याने संशयितांनी पैसे परत देण्यासाठी मुदत मागून घेतली. मुदत मागूनही पैसे परत मिळत नसल्याने व संशयित टाळाटाळ करत असल्याने अखेर तक्रारदार यांनी शहर पोलिस ठाण्यात धाव घेतली.