सातारा : मुंबई येथे म्हाडा प्रकल्पामध्ये अधिकारी असल्याचे भासवून त्याअंतर्गत फ्लॅट देण्याचे आमिष दाखवून,  ९९ लाख ८४  हजार रुपयांची फसवणूक करून तीन  वर्षापासून मिरारोड, मुंबई येथून फरार असणाऱ्या संशयिताला सातारा येथील ताब्यात घेण्यात सातारा शहर पोलीस ठाण्याच्या गुन्हे प्रकटीकरण शाखेच्या पथकाला यश आले. अरुण गणपत शिंदे वय ५२, मुळ रा. माणगाव, जि. रायगड, सध्या रा. मिरारोड, मुंबई असे त्याचे नाव आहे.
याबाबत पोलिसांनी दिलेली माहिती अशी मिरारोड, मुंबई येथे राहणाऱ्या अरुण गणपत शिंदे हा मुंबई येथे म्हाडा प्रकल्पामध्ये अधिकारी असल्याचे भासवून त्या अंतर्गत फ्लॅट देण्याचे आमिष दाखवून, विविध लोकांची ९९ लाख ८४  हजार रुपयांची फसवणूक करत तीन वर्षात पासून फरार झाला होता. वेगवेगळे फसवणुकीचे गुन्हे दाखल असणारा हा संशयीत सातारा शहर परिसरात येणार असल्याची माहिती सातारा शहर पोलीस ठाण्याचे पोलीस निरीक्षक भगवान निंबाळकर यांना मिळाली. त्यांनी तात्काळ पुणे प्रकटीकरण शाखेच्या पथकाला सूचना करून अरुण शिंदे याला ताब्यात घेण्याच्या सूचना दिल्या. पथकाने कौशल्यपूर्ण तपास करून त्याला सातारा येथून ताब्यात घेतला.
अरुण शिंदे याच्यावर मिरारोड, जोगेश्वरी, रबाळे येथील पोलीस ठाण्यात विविध गुन्हे दाखल आहेत. पुढील कार्यवाहीसाठी त्याला ताब्यात घेण्यासाठी मिरारोड येथील पोलीस पथक साताराकडे रवाना झाले आहे. या कारवाईत पोलीस उपनिरीक्षक समीर कदम, पोलीस नाईक सुजित भोसले, अविनाश चव्हाण, ज्योतीराम बर्गे, अभय साबळे, गणेश घाडगे, संतोष कचरे, सागर गायकवाड, विशाल धुमाळ यांनी सहभाग घेतला.