सातारा : शब्द दिल्याप्रमाणे खासदार उदयनराजे भोसले यांनी सातारा करण्याच्या दृष्टीने पावले टाकायला सुरुवात केली आहे. निवासस्थानी खासदार उदयनराजे यांनी महसूल व नगरपालिका प्रशासनाची बैठक घेऊन सातारा शहराच्या प्रवेशद्वारांना सुशोभित करण्याच्या दृष्टीने तसेच महामार्गावरील उड्डाणपूल व सेवा रस्ते यांचे अद्ययावतीकरण या दृष्टीने अधिकाऱ्यांना बैठकीत सूचना दिल्या. या सूचनांचे प्रस्ताव तयार करून केंद्र व राज्य शासनास सादर केले जाणार आहेत व या प्रस्तावांना जास्तीत जास्त निधी उपलब्ध करणार असल्याचे उदयनराजे यांनी प्रसिद्धीपत्रकाद्वारे सांगितले.
जलमंदिर येथून प्रसिद्ध झालेल्या पत्रकात नमूद आहे की, सातारा शहरातील वाढे फाटा, बॉम्बे रेस्टॉरंट चौक, अजंठा चौक, शिवराज चौक ठिकाणाहून सातारा शहरांमध्ये प्रवेश करण्यात येतो. यापैकी अजंठा चौक, बॉम्बे रेस्टॉरंट चौक आणि वाढे फाटा या ठिकाणच्या उड्डाणपुलाखाली राष्ट्रीय महामार्गाच्या जागेत पुण्याच्या धर्तीवर बगीचा, वॉकिंग ट्रॅक, व्हर्टिकल गार्डन, भाजी मंडई, पार्किंग, आर्टिफिशल वॉटर फाउंटन व सार्वजनिक स्वच्छता गृह बांधण्यात येणार आहे. याकरिता महसूल विभागाने तातडीने याचे इस्टिमेट व डिझाईन बनवून त्याचे प्रस्ताव सादर करावे. नगरपालिकेने तातडीने त्याला मान्यता देऊन प्रशासकीय मान्यतेची कार्यवाही करावी.
प्रसिद्धी पत्रकात पुढे नमूद आहे की, उड्डाणपुलाखाली जागेमध्ये कोणते अवैध उद्योग होऊ नये व जागेचा सुयोग्य वापर लोककल्याणासाठी व्हावा यासाठी हा निधी खर्च केला जाणार आहे. या उपक्रमासाठी राष्ट्रीय महामार्ग प्राधिकरणाची लवकरच ना-हरकत घेतली जाणार आहे. सदरचा भाग नगरपालिकेच्या हद्दीत आले असल्याने त्याचे प्रस्ताव नगरपालिका व बांधकाम विभाग यांच्या माध्यमातून सादर करून आर्किटेक्‍ट असोसिएशनकडून त्याचे प्रकल्प अहवाल तयार करून घेतले जातील. हे काम तातडीने पूर्ण करण्यासाठी अधिकाऱ्यांनी प्रयत्न करावेत. तसेच महामार्गावरील फुलांची स्वच्छता, लिंक रोड गटारांची स्वच्छता, साफसफाई आणि तेथील पथदिवे तातडीने सुरू करण्यासाठी महामार्ग प्राधिकरणाच्या अधिकाऱ्यांना सूचना देण्यात आल्या आहेत. हे प्रस्ताव मंजूर करून घेऊन त्यासाठी केंद्र शासनाकडून जास्तीत जास्त निधी आणणार असल्याचे खासदार उदयनराजे भोसले यांनी कळवले आहे.