सातारा : वाई, जावळी परिसरात आज दुपारी ढगांच्या गडगडाटात एक तास मुसळधार अवकाळी पाऊस झाला. पाचगणी, महाबळेश्वर, खंडाळा येथे हलकासा पाऊस झाला. या पावसाने वातावरणात गारवा आला. त्यामुळे लोक सुखावल्याचे दिसून आले.

सातारा शहर परिसरात आज दुपारी झालेल्या पावसाच्या शिडकाव्याने सातारकरांना उकाड्यापासून थोडासा दिलासा दिला. या शिडकाव्यामुळे मातीमधील सुगंधाचाही अनेकांनी आनंद लुटला. मात्र, यानंतर वातावरण पुन्हा एकदा जैसे थे झाले. आज दुपारी वाई, जावळी परिसरात ढगांच्या गडगडाटात मुसळधार पाऊस झाला. मंगळवारी सायंकाळी वाई, महाबळेश्वर, पाचगणी परिसरात प्रथमच हलकासा पाऊस झाला होता. त्यामुळे रस्ता ओला झाला. परंतु या पावसाने थोडासा गारवा आल्याने लोक सुखावले आहेत.

हा पाऊस फक्त वाई, जावळी परिसरातच झाला. मात्र पावसाने धुंद वातावरण तयार केले. उत्तर कोरेगाव परिसरात जोरदार वारे वाहिले. वाई-पाचवड रस्त्यावर अनेक ठिकाणी झाडांच्या फांद्या पडल्या होत्या. जोरदार वारे वाहिल्यामुळे आंब्यांचा सडा रस्त्यावर पडला होता. वाई सुरूर मार्गावर वादळी पाऊस व वाऱ्यामुळे झाड कोसळल्याने वाहतूक विस्कळीत होवून वाहनधारकांची गैरसोय झाली.

खूप दिवसांनी पाऊस झाल्यामुळे दुपारी आलेल्या गारव्यानंतर सायंकाळी पुन्हा उकाडा जाणवायला लागला. सुरूर- महाबळेश्वर रस्त्यावर वाई शहाबाग फाट्यावर आंब्याचे मोठे झाड पडले होते. झाड काढण्याची कार्यवाही सुरु आहे. सायंकाळी उशिरा झाड हटवून वाहतुकीसाठी मार्ग सुरू करण्यात आला आहे.