नवी दिल्ली: कुरापतखोर चीनला धडा शिकवण्यासाठी ‘आत्मनिर्भरता’ हा एकमेव उपाय असल्याचे सांगत केंद्र सरकारने चीनमधील आयातीवर निर्बंध लादले. संपूर्ण देशभरातून चीनी मालाविषयी प्रचंड राग व्यक्त होवू लागला. चीन वस्तूंविरोधात बहिष्काराचे हत्यार अनेकांनी उपसले. त्यामुळे बर्‍याच चिनी कंपन्यांच्या भारतातील शोरूमसमोर ‘मेड इन इंडिया’ चे फलकही झळकले. मात्र औषध कंपन्यांसमोर या निर्णयामुळे नवे संकट उभे राहिले असल्याचे वृत्त सीएनबीसी टीव्ही 18 ने दिले आहे.
दरम्यान, गलवान खोर्‍यातील संघर्षानंतर चिनी सामानावर बहिष्कार घालण्याची, चीनमधून आयात बंद करण्याची मागणी होत आहे. पण सध्या याचा भारतीय औषध कंपन्यांना फटका बसत आहे. भारतीय औषध कंपन्यांनी चीनमधून आयात केलेला माल बंदरात अडकून पडला आहे. त्यामुळे औषध उत्पादनावर परिणाम होण्याची शक्यता आहे.
भारतीय औषध कंपन्यांनी वरिष्ठ सरकारी कार्यालयं आणि पंतप्रधान कार्यालयाला आयातीला मंजुरी देण्यासाठी साकडं घातलं आहे. औषध निर्मितीसाठी चीनमधून मागवलेला कच्चा माल, द्रव्य, उजतखऊ-19 उपकरणे जवाहरलाल नेहरु बंदर आणि दिल्ली विमानतळावर अडकून पडली आहेत. सीएनबीसी टीव्ही 18 ने हे वृत्त दिले.
बंदरामधून हा माल बाहेर निघाला तर औषध कंपन्यांपर्यंत पोहोचू शकतो. पण आवश्यक मंजुरीविना हा माल अजून बंदरामध्येच आहे. आयातील प्राधान्य देऊन झटपट मंजुरी दिली नाही तर 90 ते 100 टक्के उत्पादन कायम ठेवणे कठिण आहे तसेच करोना व्हायरसच्या या संकटकाळात औषध पुरवठयाची साखळी सुद्धा विस्कळीत होईल असे औषध क्षेत्रातील जाणकारांनी सांगितले. औषध उद्योगाने तात्काळ सरकारी हस्तक्षेपाची मागणी केली आहे. औषध क्षेत्रासाठी घेतलेले धोरणात्मक निर्णय चांगले आहेत पण आत्मनिर्भर व्हायला वेळ लागेल असे औषध क्षेत्रातील कंपन्यांचे म्हणणे आहे.