लखनऊ : पंतप्रधान नरेंद्र मोदी यांचे मंदीर पुण्यातील एका भाजप कार्यकर्त्याने नुकतेच उभारले होते. त्यावर वाद झाल्यानंतर हे मंदीर दुसऱ्याच दिवशी लगेच हटवण्यात आलं. पंतप्रधान कार्यालयातूनच हे मंदीर हटवण्याचे आदेश आले होते, असे पुढे आले होते. आता भाजपच्या एका मंत्र्याने पंतप्रधान मोदींविषयी असंच वक्तव्य केलं आहे. मोदी हे सर्वसाधारण व्यक्ती नव्हे तर देवाचे अवतार असल्याचे या मंत्र्यांनी म्हटलं आहे. पंतप्रधान नरेंद्र मोदी हे देवाचा अवतार असल्याचा साक्षात्कार उत्तर प्रदेशच्या शिक्षण राज्यमंत्र्यांना झाला आहे. गुलाब देवी या उत्तर प्रदेशच्या शिक्षण राज्यमंत्री (स्वतंत्र प्रभार) आहेत.

चंदौसी शहरात आयोजित एका कार्यक्रमात बोलताना त्या म्हणाल्या की, पंतप्रधान नरेंद्र मोदी हे देवाचा अवतार असून त्यांना साक्षात देवानेच धरतीवर पाठवले आहे. मोदींसारखी व्यक्ती यापूर्वी कोणी नव्हता आणि भविष्यातही तशी व्यक्ती होणार नाही असे त्या म्हणाल्या. देव जसा सगळ्यांसाठी आदर्श असतो तसेच पंतप्रधान मोदींबाबत असून ते जेव्हा बोलतात तेव्हा संपूर्ण देश त्यावर अंमलबजावणी करतो आणि यापेक्षा मोठा पुरावा अजून काय असू शकतो असे गुलाब देवी यांनी म्हटले आहे.