बॉलिवूडच्या टायगर श्रॉफचा अॅक्शन पॅक्ड चित्रपट 'बागी २'ला सिनेरसिकांकडून भरभरून प्रतिसाद मिळत आहे. या चित्रपटानं बॉक्स ऑफिसवर धम्माल उडवून दिली आहे. हा चित्रपट सध्या हाऊसफुल असून पहिल्या तीन दिवसांत जवळपास ७३ कोटींचा गल्ला जमवला आहे. 

'बॉक्स ऑफिस इंडिया डॉट कॉम'च्या वृत्तानुसार, टायगर आणि दिशा पटानीच्या या चित्रपटानं पहिल्याच दिवशी २५ कोटी रुपयांची कमाई करून जबरदस्त ओपनिंग केली. दुसऱ्या दिवशी बॉक्स ऑफिसवर सुमारे २०.५० कोटी रुपयांचा गल्ला जमवला. रविवारी चित्रपटानं चांगली कमाई केली. जवळपास २८ कोटी रुपये कमावले. हे 'बागी २'चं मोठं यश मानलं जात आहे. उत्तर प्रदेश आणि बिहारमध्ये काही ठिकाणी बॉक्स ऑफिस कलेक्शनच्या बाबतीत 'बाहुबली २'लाही मागं टाकलं आहे.