दिल्ली : इन्फोसिसचे संस्थापक नारायण मूर्ती यांचे जावई ऋषी सुनक यांची ब्रिटनच्या पंतप्रधानपदी निवड झाली आहे. ऋषी सुनक हे ब्रिटनच्या सर्वोच्च पदावर बसणारे पहिले हिंदुस्थानी वंशाचे नागरिक आहेत. सुनक यांनी रचलेल्या इतिहासासाठी त्यांच्यावर चहूबाजूने कौतुकाचा वर्षाव होत आहे. सुनक यांचे सासरे नारायण मूर्ती यांनी देखील त्यांचे कौतुक केले आहे. त्यांनी आम्हाला ऋषीचा अभिमान वाटतो अशी प्रतिक्रीया प्रसारमाध्यमांशी बोलताना दिली आहे.

अभिनंदन ऋषी! आम्हाला त्याचा अभिमान आहे. त्याला फार यश मिळो अशी आम्ही इच्छा व्यक्त करतो. आम्हाला विश्वास आहे की तो युनायटेड किंगडममधील लोकांच्या भल्यासाठी सर्वोत्तम कामगिरी करेल,' असं नारायण मूर्ती यांनी म्हटलं आहे. ऋषी सुनक यांचे लग्न इन्फोसिसचे प्रमुख नारायण मूर्ती यांची मुलगी अक्षता मूर्तीशी झाले आहे. त्यांना कृष्णा आणि अनुष्का या दोन मुली आहेत. सासरच्या मंडळींना भेटण्यासाठी ते पत्नी आणि दोन मुलांसह अनेकदा बंगळुरुला येऊन गेले.

ऋषी सुनक यांचा जन्म इंग्लंजच्या साऊदम्पटनमध्ये झाला होता. सुनक यांचे वडील यशवीर केनियातून तर आई उषा 1960 च्या दशकामध्ये टांझानियातून ब्रिटनला येऊन स्थायिक झाली होती. पण ते मूळचे स्वातंत्र्यपूर्व काळातील हिंदुस्थानच्या पंजाब प्रांतातले आहेत. सुनक यांचे वडील यशवीर डॉक्टर होते आणि उषा फार्मसी चालवायच्या. पण ऋषी सुनक फायनान्स आणि गुंतवणूक क्षेत्राकडे वळले.