सातारा : हॉटेल सातारा पॅलेसमध्ये रात्री उशीरापर्यंत सुमारे 20 जणांच्या टोळक्याने वाढदिवसाची पार्टी’ केल्याचे समोर आले असून शहर पोलिसांनी गुन्हा दाखल केला आहे. सातार्‍यातील एका डॉक्टरच्या मुलाची पार्टी असल्याचे पोलिसांच्या प्राथमिक तपासात निष्पन्न झाले आहे.
कमलेश निकम, अमोल घाडगे, दत्तात्रय कमाने, दत्तात्रय धुमाळ यांच्यासह 20 जणांवर (तक्रारादर यांना संशयितांची पूर्ण नावे माहित नाहीत) गुन्हा दाखल झाला आहे. याप्रकरणी पोलिस हवालदार विजय गायकवाड यांनी पोलिस ठाण्यात तक्रार दिली आहे.
याबाबत अधिक माहिती अशी, ही घटना शनिवारी मध्यरात्री साडेअकरा वाजता घडली आहे. हॉटेल सातारा पॅलेससमोर गर्दी दिसली. पोलिस गाडीतून खाली उतरुन धरपकड करण्यासाठी जात असताना संशयितांनी तेथून अंधाराचा गैरफायदा घेवून पळ काढला. चौकशीत सातारा पॅलेस हॉटेलमध्ये पार्टी झाल्याचे समोर आले. पोलिसांनी सातारा पॅलेस हॉटेलमध्ये धाव घेवून पाहणी केली असता आतमध्ये जेवणाची ताटे, दारुच्या बाटल्या पडलेल्या होत्या. दारुच्या परवानगीबाबत पोलिसांनी विचारल्यानंतर हॉटेलचे कर्मचारी निरुत्तर झाले. पार्टी कोणाची? अशी विचारणा केल्यानंतर हॉटेलमधील कर्मचार्‍यांनी असे सांगितले की, हॉटेल मालकांच्या परवानगीने एका डॉक्टरच्या मुलाची बर्थडे पार्टी होती.