सातारा : अजनूज, तालुका खंडाळा येथील जिल्हा परिषदेच्या शाळेच्या परिसरात 689 ग्राम गांजा बाळगणाऱ्याला खंडाळा पोलिसांनी ताब्यात घेतले आहे.

तुळशीराम कोंडीराम वरपे राहणार अजनुज तालुका खंडाळा असे अटक केलेल्याचे नाव आहे. या प्रकरणी पोलीस हवालदार संजय जाधव यांनी फिर्याद दिली आहे.

याबाबत पोलिसांनी दिलेली माहिती अशी, दिनांक 3 एप्रिल रोजी दुपारी पावणेदोन च्या दरम्यान पोलिसांना अमली पदार्थांची विक्री होणार असल्याची माहिती मिळाली होती. त्यानुसार जिल्हा परिषदेच्या शाळेजवळील पश्चिम भागातील मोकळ्या जागेत पोलिसांनी वरपे यांची कसून चौकशी केली असता त्यांच्या काळ्या रंगाच्या पिशवीत उग्र वासाचा ओलसर गांजा आढळून आला. त्याचे वजन 689 ग्राम इतके भरले. यासंदर्भात वरपे अधिक माहिती देऊ शकले नाहीत. विनापरवाना गांजा विक्री व स्वतःच्या कब्जात गांजा ठेवणे या प्रकरणी त्यांच्यावर गुन्ह्याची नोंद करण्यात आली आहे. पोलीस निरीक्षक एम. एस. शेळके अधिक तपास करत आहेत.