नवी दिल्ली: केंद्रीय आरोग्य मंत्री डॉ. हर्षवर्धन यांनी कोरोनाच्या संकटाच्या पार्श्वभूमीवर दिलासादायक संकेत दिले आहेत. ते म्हणाले की, भारतात कदाचित कोरोना महामारीचा सर्वात वाईट काळ संपला आहे. तसेच आठवड्याभरात भारत आपल्या नागरिकांना लस देण्याच्या स्थितीत असेल. भारतात जानेवारी महिन्यापासून कोरोना लसीचा पहिला डोस दिला जाणार असल्याचे संकेतही त्यांनी दिले आहेत. 
हर्षवर्धन यांनी एका निवेदनात म्हटले आहे की, मला वैयक्तिकरित्या वाटते की कदाचित जानेवारीच्या काही आठवड्यात आम्ही लसीकरणास सुरुवात करू. आमची पहिली प्राथमिकता लसींची सुरक्षा आणि परिणामकारकता आहे. आम्हाला यावर तडजोड करण्याची इच्छा नाही. 
भारतात सध्या एकूण 8 लसीच्या चाचण्या सुरू आहेत. या सर्व चाचण्या वेगवेगळ्या टप्प्यात आहेत. काही आगाऊ स्टेजवर आहेत तर काही शेवटच्या टप्प्यात आहेत. ऑक्सफोर्ड आणि अ‍ॅस्ट्रॅजेनेकाची लस कोविशिल्ड आहे. त्याची चाचणी सिरम इन्स्टिट्यूट ऑफ इंडिया करत आहे. या लसीच्या चाचणीचा तिसरा टप्पा चालू असून अंतिम टप्प्यात आहे. द भारताच्या ड्रग रेगुलेटर, ड्रग कंट्रोलर जनरल ऑफ इंडियाकडे आपत्कालीन वापरासाठी परवानगी मागितली आहे.