उत्तराखंड : एका खाण माफियाला पकडण्यासाठी उत्तराखंडला गेलेल्या उत्तर प्रदेश पोलिसांच्या तुकडीवर भयंकर हल्ला करण्यात आला आहे. या हल्ल्यादरम्यान पोलिसांवर गोळीबार करण्यात आला नंतर त्यांना पकडण्यात आलं आणि अपहरण करून बेदम मारहाण करण्यात आली. या हल्ल्यामध्ये एकूण 6 पोलीस कर्मचारी जखमी झाले आहेत तर 2 पोलीस कर्मचारी हे बेपत्ता आहेत.

13 सप्टेंबर रोजी जफर नावाच्या एका खाण माफियाने पोलीस अधिकारी तसेच प्रशासकीय अधिकाऱ्यांसोबत अभद्र वर्तन केलं होतं. यावर उत्तर प्रदेशचे मुख्यमंत्री योगी आदित्यनाथ हे संतापले होते. यामुळे मुरादाबाद पोलिसांनी जफरसह अन्य काही जणांविरोधात गुन्हा नोंदवला होता. तेव्हापासून जफर फरार झाला होता. फरार झालेला जफर उत्तराखंडमध्ये लपण्यासाठी जागा शोधत होता. जफरने गुरताज सिंह नावाच्या एका व्यक्तीच्या घरात घुसखोरी केली होती. पोलिसांना तो तिथे लपल्याचं कळाल्यानंतर पोलिसांचं एक पथक त्याला पकडण्यासाठी उत्तराखंडमध्ये पोहोचलं होतं.

जफर ज्या घरात लपला होता, त्या घराला पोलिसांना वेढा घातला असता जफरच्या साथीदारांनी आणि स्थानिकांनी पोलिसांना मारहाण करायला सुरुवात केली. पोलीस कर्मचाऱ्यांना पकडण्यात आलं आणि त्यांना बेदम मारहाण करण्यात आली. पोलिसांवर गोळ्या झाडण्यात आल्या, ज्यात 2 जण जखमी झाले आहेत. या हल्ल्यात 6 पोलीस कर्मचारी जखमी झाले असून दोघेजण गायब आहेत. धक्कादायक बाब ही आहे की जफर ज्या घरात लपला होता, त्या घराचे मालक गुरताज सिंह यांची पत्नी गुरमीत कौर यांचा गोळीबारात मृत्यू झाला आहे.